Sağlamlıq məlumatına razılıq

«Fərdi məlumatlar haqqında» qanuna görə sağlamlıq vəziyyəti barədə məlumat xüsusi kateqoriyaya aiddir. Adi rezerv məlumatından fərqli olaraq, onun toplanması üçün subyektin açıq razılığı lazımdır.

Bunu açıq yazırıq, çünki ən çox səhv burada olur:

• Rezerv etmək üçün yalnız ad, telefon və seçilmiş xidmət lazımdır.
• Xidmətin adı neytral olmalıdır — «Konsultasiya», «Plomb», «Baxış». Diaqnoz xidmət adına yazılmır.
• Xatırlatma mesajında heç vaxt diaqnoz və ya müalicə təfərrüatı olmur. Mesaj mobil operatordan keçir və telefonun kilid ekranında görünür.

Yəni adi rezervasiya axını sağlamlıq məlumatı toplamır və bu səhifə ona şamil olunmur.

Klinika müştəri barədə klinik qeyd yazmaq istəyirsə, bu, ayrıca funksiyadır və ayrıca razılıq tələb edir. Belə qeydlər:

• Rezerv cədvəlindən ayrı cədvəldə saxlanılır.
• Şifrələnir — baza oğurlansa belə oxuna bilmir.
• Analitikaya, hesabatlara və bildiriş mətnlərinə düşmür.
• Yalnız həmin klinikanın səlahiyyətli işçiləri üçün açıqdır.

Klinik qeyd yazan klinika, məlumatın sahibi kimi, aşağıdakılara cavabdehdir:

• Pasiyentdən yazılı razılıq almaq.
• Yalnız müalicə üçün zəruri olan məlumatı yazmaq.
• 1,000-dən çox subyektin məlumatı işlənirsə, sistemi Rəqəmsal İnkişaf və Nəqliyyat Nazirliyində qeydiyyata almaq.

Biz texniki tərəfi təmin edirik: şifrələmə, ayrılıq, giriş nəzarəti. Razılıq almaq isə klinikanın öhdəliyidir.

Pasiyent istənilən vaxt:

• Haqqında hansı məlumatın saxlandığını soruşa bilər.
• Səhv məlumatı düzəltdirə bilər.
• Razılığını geri götürə bilər — bu halda klinik qeydlər silinir.

Müraciət klinikanın özünə edilir. Klinika bizə müraciət edərsə, texniki dəstək göstəririk.

Serverlərimiz Türkiyə ərazisindədir. Klinik qeydlər tələb olunduğu halda Azərbaycandakı serverə köçürülə bilər — sərhəddən keçirmə hər subyektdən ayrıca yazılı razılıq tələb etdiyi üçün bu, klinika ilə razılaşdırılır.

Suallar üçün Instagram və ya əlaqə səhifəsi. Məlumatların ümumi işlənməsi barədə: Məxfilik siyasəti.